Hryðjuverk
Það er kannski erfitt að finna eitthvað jákvætt að segja um hryðjuverkamenn. En þeir hafa allavega stundum sóma í að viðurkenna glæp sinn og "lýsa yfir ábyrgð" á ódæðum sem þeir fremja. Þetta gerist hins vegar ekki alltaf. Ég vildi sjá meira um að glæpamenn lýsi yfir ábyrgð á verkum sínum. Maður heyrir til dæmis aldrei sagt í fréttum "Söluturn við Skúlagötu var rændur á sjötta tímanum í morgun. Sökudólgurinn var vopnaður barefli og hafði á för með sér um 20.000 krónur úr peningakassa verslunarinnar. Enginn hefur enn lýst yfir ábyrgð á ráninu". Mér finnst að glæpamenn ættu að taka sér hryðjuverkamenn til fyrirmyndar hvað þetta varðar. Þá gætum við farið að heyra fréttir á borð við þessa í fjölmiðlum: "Verslun 10-11 við Hrafntinnuveg í Hafnarfirði var rænd á tíunda tímanum í kvöld. Tveir menn, vopnaðir eggvopnum ógnuðu afgreiðslufólki og viðskiptavinum og höfðu á brott með sér umtalsvert magn af hárgeli. Haffi Hark og Svenni Sveitti sem starfa í glæpafélaginu "Hendur í hári" hafa lýst yfir ábyrgð á ódæðinu".